web analytics
الأسرةالعلاقة بين الأزواجالعلاقة بين الأسرة

سوبر ست بيت

جوزي زي الشاطر كلمني وانا في الشغل يقول اقاربه جايين من البلد علي الغدا،ياسلام حسيت ان حد رمي جردل ميه ساقعه علي دماغي ،طبعا لازم نفهم ان الجماعه دول ماينفعش يأكلوا من اي مطعم ولا هيكفي الفريق ده اي اكل ،وجوزي هيفتح الجاعوره علي الرابع ويقول طبعا ماانتي كسفاني وشكلي وهيعيبوا ويتريقوا عليكي،طبعا انا الصدمه خدتها وسكت جريت اخدت اذن الساعه 12،و اول ما طلعت نزلت اشتريت بطه وفرختين وبسرعه سلقت ومن مرقة البط عملت رقاق ،في اثناء ما ده بيتعمل شغلت المكنسه ولمعت الترابيزات والبوفيه والمرايات ،ونظفت الحمام ،وغيرت الفوط ،و رتبت الاوض،وجهزت العصائر ،وغسلت الكوبايات اللي هيتقدم فيها الشاي والميه ،وكل حاجه جاهزه علي الشعره قبيلة جوزي ،كان قدامهم شوربه و سلاطه و رقاق و ملوخيه وصينيه بطاطس وبط وفراخ متبلين في الفرن وشكلهم يفرح ،شربوا العصيروشاي والفواكه والحلويات،و تعليق الباشا مافيش شكرا ربنا يخليكي و لا اي اندهاشه،طبعا بعد غسيل الاطباق والتوضيب و تنظيف الشقه ،المفروض اقعد بقي لرتاح ابدا ازاي انا سوبر ست بيت ما تيجي انا فاضي عايز اجيب حاجات من كارفور ،لا مالقيتش غير النهارده ،طبعا اتقمص وزعل وقلب وشه ،اتكسفت وقلت يلا ننزل ياريتني ما نطقت ،نزلنا ولفينا وعايزه اقولكم جوزي طويل لازم البس كعب وانا خارجه معه ،كعب ولف 3 ساعات وفي الاخر اشتري حاجات تافه جدا كان ممكن يشتريها لوحده ،نمت قتيله من كتر التعب في الاخر تاني يوم الصبح قال ايه تصوروا انتي للدرجه دي كنتي تعبانه بتشخري طول الليل ،ياسلام لولا كده ماكنتش حسيت بي ،ياراجل ده انا لو مكينه كنت بوظت قطعت شحن ،بجد الاحساس منعدم ،صحيح الاحساس نعمه.

housechores

RODAINA

انا مدرسه انجليزي K.G.1 زوجه ولدي اطفال
إغلاق