انا قلت كده لجوزي ،خلاص انا عديت الخط الاحمر ايه زهقت ،اللي ببات فيه بصبح فيه ،الاولاد يجهزوا للمدرسه ،اوصلهم، اروح شغل ارجع اخدهم اوضب للغدا يتغدوا مذاكره دروس اوضب البيت اجهز اكل تاني يوم اكوي انزل اجيب طلبات لو فيه حاجه ناقصه ايه زنبلك شغاله 24 ساعه ايه هو انا مش بني ادمه ده لو بشتغل بفلوس كان ربنا رحمني ،ايه ده غير التدريب روحي مع البنات، لو حد تعبان انا اللي اروح بيهم ايه اتخنقت مافيش خروجه حلوه طب بلاش عشان التكاليف طب كلمه طب نظرة امتننان ،ومحدش يرد ويقول كل الرجاله كده لا فيه رجاله بتعرف تشكر وتقدر وتساعد بس مش اي ست الست اللي تعرف امتي تدي وتحسسك ان ده اخرها وانت جي عليها مش احنا اللي بنعمل كل حاجه واي حاجه عشان نرضي الباشا وعياله اللي ابتدوا يكبروا ويقلدوا البيه وميعرفوش يقولوا كلمة شكرا ولا حتي ربنا يخليكي يا ماما ،المهم كنت راجعه من الشغل وتعبانه ومش شايفه قدامي وده داخل متنرفز وعمال يتقمر ويطلب وقاعد علي الكنبه وبناته قاعدين زي الاميرات جنب الملك وانا الوصيفه وقفت هبيت فيهم وكلتهم ،مقدرتش تعبت زهقت طلبات ومحدش مقدر قلت له بس انا شكلي هعمل معاكم الصح ضحك وقال: خير يامعلم ناوي علي ايه رديت :من غير تريقه هتشوف عملت خطه اه والله عملت عيانه يومين اتفرجوا علي البهدله كل حاجه في ثانيه اتقلبت ،الدروس التدريب الهدوم الصاله اوض البنات كانوا هيتجننوا الاكل ،وكل شويه شكلك بقيتي كويسه اه شدي حيلك ايه بقي هتخفي امتي قلت في عقلي :احسن اتربوا بقي ،الباشا حس اد ايه المسئوليه كبيره وهو مش قدها كنت حسه انه فاهم خطتي وبيراجع نفسه،وفي يوم وانا لسه علي خطتي لقيته جايب مرات البواب نظفت وروقت الشقه وانا ساكته ،جاب غدا وتورته وقال ،جهزي نفسك هنروح النادي نشرب حاجه خرجنا من غير البنات وانبسط قال :احنا الاتنين احتجنا اليوم ده واضح ان الثوره اللي عملتيها كان انذار لينا كلنا اننا لازم نساعدك ،و ده يقع تحت اسم العصيان المدني اللي ممكن يوقع بلد لو قعد 3 ايام ولا ثوره قلت له :لا ده اسمه العين الحمرا وهو ده احسن تهديد.
