web analytics
قصص

يوميات زوجه مصريه جدا – الحلقه الثالثه

الحلقه الثالثه

نكمل الخناقه اللي وقفنا عندها

حسين:قصدك ايه ياحنان انا راجع من الشغل عندي صداع

حنان:مش قصدي حاجه بس انا اول واحده بتصحي في البيت واخر واحده بتنام  وانت عارف انا بتعب اد ايه من مذاكره للاولاد للمطبخ للبيت للغسيل مفيش مره ترجع من الشغل تقولي ريحي انتي النهارده وانا هذاكر للاولاد

حسين:وانا كمان بتعب في شغلي والبيت وظيفتك انتي

حنان:حسين ادخل نام عشان الحق اصحي الاولاد

حسين :طيب هاتي لي مسكن عشان الصداع

حنان:حااااااااااااااضر

حسين:شكرا ياحبيبتي

الاولاد صحيوا وذاكروا وطبعا زعلوا عشان مش هيخرجوا بس حنان قالت لهم ايه

حنان:معلش ياعمر انت ونور ما تزعلوش بابا عنده شغل كتير وهو بيتعب عشان مين عشانكوا وهو بيستحمل كتير احنا كمان نستحمله ومش هتفرق كتير كل الحكايه اسبوع وان شاء الله الاسبوع الجاي نخرج خروجه حلوه وبعدين تيته هتيجي يوم الجمعه تتغدي معانا

عمر:خلاص اوك ياماما مش زعلانين

حنان :وانتي يا نور مش زعلانه

نور:لا ياماما ربنا يخليكي لينا انتي وبابا

حنان:طيب يالا ذاكروا وانا معاكوا لو محتاجين مساعده

يوم الخميس في شغل حسين

حسين دخل مكتبه السكرتيره بلغته ان الاستاذه سلمي  المحاسبه الجديده في انتظاره

حسين:صباح الخير استاذه سلمي

سلمي:صباح الخير استاذ حسين انا جاهزه للتدريب

حسين:طيب ممكن تكلميني عن نفسك شويه يعني ايه معرفتك بالمحاسبه وخبراتك السابقه في الشغل وكده

سلمي:انا اول مره اشتغل في المحاسبه انا اتخرجت من الكليه واتجوزت علي طول بس للاسف كانت تجربه فاشله الي حد كبير وانفصلنا وبعد كده فكرت في الشغل واستاذ احمد المدير صديق العائله ووالدي طلب منه اني اشتغل معاكوا

حسين:اه بس واضح ان استاذ احمد بيعزك اوي موصيني عليكي طيب احنا هنبدأ دلوقتي شويه وبعدين انا هديكي شويه حاجات تبصي فيها وانا هكمل شغلي وبعد ما اخلص شغلي هقعد معاكي ساعتين بعد المواعيد الرسميه تمام

سلمي:طيب تمام بس حضرتك ليه جد اوي كده

حسين:انا بحب شغلي وطبيعتي اني جد في الشغل

سلمي :طيب اوك اتفضل نبدأ

في البيت كانت حنان بتفكر في الموظفه الجديده ومستنيه حسين يرجع عشان تعرف منه كل حاجه عنها وقلبها كان مش مطمن

ياتري خوف حنان كان في محله ولا مجرد غيره

انتظروا الحلقه القادمه

RehamHaroun

عندي 25 سنه متزوجه وعندي بنت متخرجه من كليه تجاره جامعه عين شمس عام2008

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.

إغلاق