web analytics
قصص

يوميات زوجه مصريه جدا – الحلقه الخامسه

الحلقه الخامسه

نرجع لمكتب حسين سلمي وحسين مع بعض هو بيشتغل وهي قاعده بتبص له لدرجه انه خد باله كل ما يبص عليها يلاقيها بتبص له حسين سنه مش كبير في اوائل الثلاثينات ووسيم وبيهتم بشكله ومظهره

حسين:استاذه سلمي ايه اخبار الموازنات فاهماها كويس

سلمي:مش اوي انا بحاول افتكر كنا بناخد زيها في الكليه

حسين:عموما انتي بس خدي فكره وانا هخلص شغلي واتابع معاكي

سلمي:استاذ حسين انا مش كبيره اوي عشان تقولي استاذه ممكن نشيل الألقاب

حسين:اه بس احنا في الشغل وكلنا هنا بنتكلم رسمي

سلمي:انا مش بحب جو الرسميات ده

حسين:لا معلش مضطرين لاننا في الشغل

سلمي لفت نظرها حسين من اول ما دخل المكتب وحسين كمان لفتت نظره سلمي بلبسها المتحرر وسنها صغير وجميله

سلمي :ممكن اخد راحه شويه

حسين:اه طبعا اتفضلي

سلمي:انا هجيب ساندوتشات من الكافيتريا اجيب لحضرتك معايا

حسين:لا شكرا

سلمي :ليه نأكل سوا انا لاحظت انك ما اكلتش حاجه من ساعه ماجيت الصبح

حسين:انا متعود بفطر في البيت مع مراتي ولما بروح بنتغدي سوا

سلمي:انا بحسدها عليك

حسين:افندم

سلمي:لا ابدا انا اسفه انا بس افتكرت زوجي او طليقي.

حسين:طيب اوك تقدري تتفضلي .

طبعا حسين كان تقيل اوي او بمعني اصح كان جد اوي مع سلمي ده لانه بيحب بيته واولاده وطبعه انه جاد جدا في الشغل وسلمي كانت بتحاول تخليه يتكلم عن حياته اكتر بس ما قدرتش.

في البيت حنان خلصت المحشي والاولاد رجعوا من المدرسه

نور:ماما ممكن العب شويه انا وعمر بكره اجازه

حنان:طيب العبوا شويه لحد ما بابا يجي من الشغل عشان نتغدي كلنا سوا

نور:شكرا ياماما

حنان مش قادره تمنع نفسها في التفكير في الموظفه الجديده حنان بعد كل السنين دي لسه بتغير علي حسين بالرغم ان هي عارفه كويس اوي ان حسين بيحبها بس هي طبعا شكلها اتغير كتير عن زمان في الوقت ده حنان حست ان هي اللي محتاجه تغير جو مش ميرفت وجوزها  وفكرت ان عيد جوازهم قرب وكانت عايزه تعمل مفاجأه لحسين انها تحجز يومين في الغردقه وفي نفس الفندق اللي قضوا فيه شهر العسل

انتظروا الحلقه القادمه

 

 

 

 

RehamHaroun

عندي 25 سنه متزوجه وعندي بنت متخرجه من كليه تجاره جامعه عين شمس عام2008

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.

إغلاق