web analytics
كتابات شخصية

جيرانا ” ليهم العجب ” 1

من فتره مش طويله اوي قررنا اننا ننتقل من شقتنا القديمه لشقه جديده في مدينه جديده ، من حوال 12 سنه كده ، وفعلا اخذنا القرار وانتقلنا للشقه الجديده ، والمدينه جميله جدا وفي منتهي النضافه ، بس في مشكله ،

المشكله دي عجيبه حبتين ، مبدئيا المشكله هي الجيران ، من اول يوم لينا فالشقه ، خبط الباب ، فتحت لئيت بنت شابه صغيره وانا كنت ساعتها اعتبر طفله ، المهم يا ساده … قولتلها اهلا اذيك ؟ الحمد لله ، قالتلي انا جارتكوا اللي ساكنه في الدور الاخير احنا هنا بننزل كل يوم نتجمع بنات العماره ونتمشي او نعد مع بعض عند واحده مننا ، هخبط عليكي انزلي معانا ، فالحقيقه فرحت جدا جدا ،صاحبه جديده من اول يوم ليا فالشقه ،

بالليل خبط الباب كانت هي برده ، قالتلي اجهزي عشان ننزل ، جهزت ونزلت معاها ، واذا بها محبوبة الشله بتعرفني علي بنات العماره واحده ساكنه معاها فنفس الدور ودي بصتلي بصه سوسه حبتين ومعبرتنيش ، والتانيه في الشقه اللي ادامها ، ودي باين جدا من نظراتها انها غلبانه وطيبه ، باستني ورحبت بيا جدا ، وواحده تالته دي صاحبتها من العماره المجاوره لينا ، ودي سلمت عليا بس راحت بصه للجاره المغواره الياه حتة بصه غريبه اللي هي معناها ” انا هطلع عينك عاللي عملتيه ده ” ، انا حاولت اندمج معاهم وقضيت وقت لذيذ مع ان كل شويه كان بيظهر حد يتفرج عالساكنه الجديده ، بس ما علينا ….في اخر السهره مع البنات كله طلع شقته الا جارة الدور الاخير ، قالتلي ” تعالي استأذني والدتك واطلعي معايا اعرفك علي اخواتي ومامتي ” ،

طلعت معاها فعلا والمفجأه الكبري العائله اللذيذه ، كلهم وقفوا يتفرجوا عالكائن العجيب الجديد ده ، وبوس واحضان ، ودخلوني اعد معاهم في البلكونه اللي كانوا حاطين فيها تليفزيون وده كان ” مركز المراقبه الخاص بيهم ” من خلاله بيعرفوا اخبار كل الجيران ، ما علينا …. كنت محرجه طبعا ، مامتها قالتلي ليه كده اعدي عادي انتو صحاب يا بنات وكلام كتير وما تلاه كان اعظم وادهي ،

سالتني هو انتي ممتك بتشتغل ؟ رديت اه ، وسالت عن ماما اسئله كتييييير وكأنها هتطلعلها بطاقه ، وبدأت تسأل عن بابا ، وانا برد بس ، وبعدين اخواتي ، وفجأه يا ساده في سؤال غريب اتسأل انا معرفتش ارد عليه ، مين اشد بابا ولا ماما يعني مين اللي كلمته بتمشي ؟؟؟ ،

من شدة صدمتي اتخرست !!! ، ليه بتسال سؤال زي ده ؟ و هيفيدها في ايه ؟ ، معرفتش الحقيقه وقتها ، خصوصا اننا فالبيت معندناش شخص متحكم زي مهي ما سألت عندنا نظام ديموقراطي اسري زي اي عائله افرادها متعلمين ، ولكن اكتشفت ان فبيتهم هي المسيطره الاولي والاخيره وان البنت مقدرتش تسيبني الا لما مامتها تقعدني علي كرسي الاعتراف ، وبعدها بايام عرفت ان العائله دي هي الصندوق الاسود لكل العماره ، اما الباقيين هحكيلكوا عليهم بعدين .

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.

إغلاق