web analytics
كتابات شخصية

كونك مصريا

حاجه غريبه انزل اي وقت من بيتك تلاقي تكشيره علي وش الناس،كل واحد تبص في وشه تلاقيه شايل هم الدنيا،تتكلم مع اي حد يقول ياعم لاالامور ماشيه لاقبل الثوره ولابعدها نبيع عيالنا ولا نبيع نفسنا ،الفلوس مش مكفيه العيش الحاف نعمل ايه،ناكل بكام ونعلم العيال بكام وندفع دروس بكام ونعالجهم بكام ،ترد تقول ياعم احمد ربنا ربنا كبير ،يرد ياعم هو احنا قلنا حاجه بس الواحد بتضيق في وشه خصوصا العيال بتكبر وطلباتهم بتكتر ،قوله شوف شغل بعد الضهر ،ياعم هو حد لاقي شغل الصبح اما يلاقي شغل بعد الضهر ،طب فين النعيم اللي وعدونا بيه ايام الثوره فين النهضه ،احنا كده يا مصريين غلابه ،ماهو المصري غلبان مضطهد اصله عيل ماجبتوش ولاده سالك وربنا محبب فيه خلقه بس البخت مش بقول لك عشان الواحد مصري واخد علي قفاه ياكفيل ياكل حقه ويتبهدل في الغربه ويتمرمت عشان يسافر ويبيع اللي وراه واللي قدامه ،يايتبهدل من اهل بلده ،طب الواحد يروح فين وياكل العيال منين ،ياخسارتك يابلد الواحد لو عليه ولولا انه حرام كان قتل العيال اما دلوقتي كده طب بعدين هيحصل ايه ،طب ياعم الناس اللي معاها فلوس بيجيبوا منين ياعم انا عارف كل واحد ورزقه بس الواحد لو يعرف السكه كان زمانه وصل ،ده الواحد لو يقعد مع عياله نصف ساعه يطلبوا منه تلاتين طلب وكله دلوقتي وضروري ،طب الناس اللي راكبه عربيات غاليه وبتعلم العيال في مدارس بالالوف دي بتجيب منين ،الحمد لله برضه علي نعمة الرضا الواحد غلبان بس عمره مامد ايده ولا حاول مهما الشيطان يزوق له الحاجات دي يستحرم ياكل الواحد حرام هو الحلال مكفي ،لو الواحد كان من اي بلد كان اتقدر ده بيقولوا في الامارات مافيش ولا واحد فقير،ولاسعودي ولاكويتي ولاحتي عراقي اهم شافوه شوية عز علي ايد صدام ولا ليبي ياه ماهو اكمن الواحد مصري ياعيني علينا احنااكيد ربناغضبان علينا مع اننا غلابه ملناش في حاجه ،ده كان حوار بين واحد موظف في ارشيف بيقبض 600 جنيه وعنده 3 عيال وبيشتغل كاشير في كافيتريا بعد الضهر ومراته موظفه في وزارة الصحه وبتقبض 1000 جنيه وعنده بنت ثانويه عامه و2 في اعدادي .

RODAINA

انا مدرسه انجليزي K.G.1 زوجه ولدي اطفال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.

إغلاق