web analytics
مقالات عامة

عندنا فى مصر

481769_415901041816376_1570759939_n
مصر اجمل واحب بلد فى العالم …فيها كتير حاجات حلوة فيها دفء وطيبه …فيها احساس بالونس رغم اى احداث بنمر بها …لا يوجد مثيل له فى العالم …لكن عندنا فى مصر حاجات كتير لازم تتغير …حاجات بسيطه مش بتعجبنى واتمنى نتخلص منها ….

عندنا فى مصر لو ركبت تاكسى مش لازم سواق التاكسى يسيبك فى حالك ونادر جدا لما تركب مع سواق تاكسى يقعد ساكت وفى حاله لازم يكون فاكر نفسه مستشار سياسى وخبير عسكرى ومحلل رياضى …ويفتى فى كل حاجه بدون انت ما تطلب منه

عندنا فى مصر لو رحت اى عيادة لازم تلاقى العيان جايب نص عيلته معاه ومحتلين عيادة الدكتور …مش مهم بقى تلاقى كرسى تقعد تستنى دورك المهم الناس دى تقوم بالواجب مع العيان بتاعهم …وغالبا مفيش دكتور بيروح العيادة فى ميعاده ولا يبقى دكتور نص نص …واى دكتور له برستيج بيحافظ عليه لازم يوصل العيادة متأخر ويكونوا العيانيين فى انتظاره
عندنا فى مصر لما اى واحدة تروح تشترى فستان او بلوزة لازم تسمع كلمه فرى سايز ….المحل كله او اغلب المعروضات فيه فرى سايز …مش عارفه مين صاحب الاختراع ده اللى قرر ان كل النساء تصلح لقالب واحد

عندنا فى مصر تلاقى ابراج وعمارات فخمه واقف قصادها سيارات تقدر بالملايين واحيانا كل بيت يمتلك اكثر من سيارة ومع ذلك لو قلت للسكان فى الشارع او العمارة هنجمع من كل شقه 5 او 10 جنيه لتزيين مدخل العمارة …تلاقى ناس كتير تتهرب او تعترض او ترفض

عندنا فى مصر لو فى اى شارع فتح محل فول او سنترال او حتى مقله لب وربنا كرم صاحبها …تلاقى تانى اليوم الشارع كله فتح نفس المشروع ونفس الفكرة …

عندنا فى مصر لو رحت اى فرح تلاقى مفيش حد قاعد على الكراسى كل الناس بترقص فى الفرح …وبعدين يطلعوا يتكلموا عن الاخلاق والحياء والخجل اللى قل فى المجتمع وده سبب بلاوى كتيرة

احنا الشعب الوحيد اللى لو نزلت الاسواق اى وقت او اى يوم فى الاسبوع تلاقى نص الناس فى الشارع    وكان مفيش اى حد راح الشغل ايه السبب مش عارفه

والله بلد جميله وماشيه بالستر

amal ibrahim

امل ابراهيم ...خريجه اعلام " قسم علاقات عامه واعلان " اهوى الكتابه
إغلاق