web analytics
مقالات عامة

يا شم النسيم يا احلي عيد

انا بصراحه بعتبر شم النسيم احلي عيد بيمر في السنه كلها ، لسبب بسيط ان شم النسيم بيجي فوقت مفيهوش اي عيد وغالبا ما بيكون غير متوقع ، يعني بتتفاجئ بيه كده وخلاص ، من زمان وانا طبعا عندي طقوس للعيد ده ،941903_442941515789282_601460365_n

واللي للاسف كل سنه بتمر بفقد طقس منهم ومش بعملوا زي الاول ، عاوزه الفت نظركوا ان العيد او اليوم ده بيكون مصدر سعاده كبير جدا للاطفال ، انا مثلا من خلال اليوم ده ، امي اعدت تشرحلي تاريخ العيد من ايام الفراعنه وايه سببه وايه طقوس الفراعنه فيه ،

فاتعرفت لاول مره علي تاريخ العيد ، مش هكدب واقول اني فهمت وقتها لاني اكيد مفهمتش بس تخيلت الكلام اللي امي وصفته ، لكن بعد ما كبرت الحكايات اللي امي حكتها عن اليوم الفرعوني ده خلتني اسعي وراء معرفه التاريخ المصري القديم ، ونمت داخلي حاجه من الشعور بالفخر بمتهي الصراحه ، لان لما تتعرض للتاريخ القديم ده وبالذات للاحتفال بعيد الربيع ” شم النسيم ” وتتعرف علي مدي احترام المصري القديم للطبيعه وانه بينفذ طقوس عشان يحتفل بزيها الجديد ،

اكيد هتستشف مدي احترامه للانسان اللي زيه ، ما علينا ، قبل شم النسيم بحوالي اسابيع كنت ببدأ احوش من مصروفي ، وكا ما اجمع مبلغ اروح اشتري بيه الوان ، واتطور الابداع شويه وبئيت اشتري ” استيكرز ” علي اشكال الشخصيات الكرتونيه ،

وتيجي بئه الليله المنتظره ليله شم النسيم ، ماما كانت بتجهز البيض طبعا في سله وتسلقه ، ونعد كلنا نلون البيض ، وانا كنت ببدع بصراحه فتلوين البيض ، بسبب عشقي للالوان و الرسم ، كنت بتخيل حديقه مثلا وارسمها عالبيض والزق استيكرز الشخصيات الكرتونيه ، منتهي الفرحه لما تنفذ بنفسك طقوس احتفال معين ، كنت بحس ان العيد ده عيد ” عيالي ” جدا ، بتاع اطفال يعني ، واللي اقصده اكتر عيد برئ ، كل الناس بتتحول فيه اطفال ، فرحه بلبس الصيف اللي كان المفروض مش بيتلبس واتلبس يوم شم النسيم ، الجو ممتع جدا ، في اكله موحده الكل بياكلها ، كل دي حاجات كانت بتفرحني وما زالت ،

بحاول كل مدي اتمسك بالطقوس دي لكن مع مرور الايام والسنين وزياده العمر ، بتكون مرغم انك تفقد تفاصيل كتير بتسعدك ، كان احسن فتره في اليوم لما نخرج لنادي او حديقه او نركب مركب في النيل ، قمة السعاده لاي شخص ما بالك الاطفال ،

حاولوا تخلوا ولادكوا يحتفلوا باليوم ده ، وخصوصا ان تكاليفه مش بتكون كبيره ، واستمتعوا معاهم ولو ليوم واحد بس فالسنه بعيد عن اي ضغط ، الطبيعه بتغير شكلها فاليوم ده حاولوا تغيروا انتوا كمان الضغوط بضحكه ولو بسيطه .

إغلاق