web analytics
الطبخ

طريقه تخزين الجبن القريش

طبعا الجبن القريش افيد انواع الجبن وافضلها للجسم وللرجيم وللاكل الصحى عامه …………
الفكره انى كنت مغتربه وسنه اولى جواز وفى مصر بنجيب الجبنه طازه وموجوده انما فى الغربه معنديش امكانيه انى انزل واجيب احتياجات البيت لوحدى ولازم اجيب الحاجه على بعضها والعروض والذى منه فكان قدامى مشكله انى اجيب جبنه بكميات مش هنقول كتير بس استخدامنا ليها مش كتير فكانت تقعد عندى فى التلاجه فتره وتبوظ وتترمى ودى حاجه كانت مزعلانى قوى 🙁 ………………………..

ومعرفتش اعمل ايه فكرت كتير وقولت اسال بتاع الهايبر اللى مسؤل عن الجبن وكان رده :

اجيب مايه واحط حبه ملح صغيرين واحط فيها الجبنه .

او اجيب لبن فى علبه بلاستيك واغطى بيها الجبنه .
واحطها فى التلاجه مش فى الفريزر عادى ….. جربتها كانت حلوه بس مش عارفه حسيت ان طعم الجبنه مش طازه اوى بس معرفش طريقه غيرها وكانت شغاله الحمد لله كويسه .

ولما نزلت مصر بقول لحماتى على الجبنه مش بتعجبنى هناك قالتلى على طريقتها الجامده

1- تنجيب صينيه ونفرد قطع الجبنه بعيده عن بعض ونرش عليها حبه ملح صغيرين ونسيبها من بليل لتانى يوم على رف التلاجه . وتانى يوم نشيل المايه الزياده اللى نزلت منها ونحطها بالصينيه فى الفريزر ونسيبها لما تجمد خالص هتلاقيها بتتشال لوحدها نجيب كيس ونعبى الجبنه فيها ونحطها فى الفريزر ونخلى بالنا لازم تكون هيا فوق ميكونش فوقها حاجه علشان متتهريش ولما نحتاج بطلعها من الكيس قبلها بيوم بتكون زى الطازه بالظبط وبتقعد كتير جدا ماشاء الله الله اكبر ……

2ـ ولما قولتلها على طريقه المايه بملح قالتلى لا تغلى المايه الاول متحطيهاش ساقعه وسبيها تدفى وحطى عليها الملح وممكن تقطعى شرايح فلفل وتحطى الجبنه وتسبيها على رف التلاجه ودى لو هتستخدميها على طول بتكون زى بتاعه المحلات بالظبط تحفه ماشاء الله …………

ياريت تدعوا لحماتى ربنا يشفيها ياااااااااارب

إغلاق