web analytics
كتابات شخصية

“ريحة” النيل

مبدئيا انا من عاشقي النيل ، لسبب بسيط جدا النيل هو ريحة مصر ، اقصد في تعبيري ان كل شخص ليه ريحته ، وبرده كل بلد ليها ريحتها ، مثلا لبنان اذا دخلتها تشم ريحة الجبال والزرع الاخضر عليها وطبعا ” برفانات الستات هناك ” ، اما مصر اول متلمس رجلك ارضها هتشم ريحة النيل ، في الشتاء ممكن تشم ريحه بروده المياه في النيل وفي الصيف هتحس برطوبة النيل الخفيفه والنسمه اللي بتيجي من عنده ، هو ده نيلنا ، photos_egypt_2013_06

زمان مثلا كان الفراعنه لازم يعدوا يوميا علي النيل ويقدسوه ويشكروه لانه ساندهم في يومهم ، وعلي حوائط المعابد ممكن تشوف بوضع رسومات لمصري قديم اعد قدام النهر العظيم ” النيل ” وبيحاول يدخل في لحظه صفاء نفسي ويشم ريحة النيل ،

زمان جدي كان دايما يحكيلي ان ايام الاجازات والاعياد كان لازم الناس يروحوا يعدوا قدام النيل ، ويغيروا جو ويقربوا اكتر منه ، علي الرغم انه مكانش في حاجه اسمها كورنيش ولا سور ولا كراسي ، وقالي كتير ان النيل زمان كان احسن من مليون بحر فمليون مصيف كفايه بس شكله ولونه والشمس وهي دايبه فمايته ،

اما دلوئتي انا نادرا لما بقدر اشم ريحة النيل ، وفي الغالب بتكون ريحه ذباله ومخلفات ، وبضحك عليكم واقلكم دي ريحة النيل ، مره فكرت اعمل زي جدي واعد قدام النيل واستمتع بشكله ، فقررت اروح اقف واصفي ذهني وفعلا روحت ووقف وسرحت فمية النيل وشكلها ولمعانها كأنها معادلة كميائيه جميله تجذب ميت عين ،

فجأه لقيت صوت عجيب غريب وحش جدا فوداني بيقولي ” يا ابله هنا كافتريا يا تعدي وتشربي حاجه يا تمشي من هنا لا مؤاخذه ” ، بصراحه انا اتصدمت من الكلام اللي قاله ، وصوته الوحش جدا ، فرديت قلتله ” انا مش هعد انا واقفه شويه وهمشي ، شكرا جدا ” ، قالي ” لا يا ابله لا مؤاخذه امشي من هنا يا تعدي وتدفعي يا تمشي ” ، قلتله ” مش هعد ومش همشي ومش هدفعلك فلوس انت اشتريت النيل واحنا مش عارفين ” ، رد عليا قالي ” لا مشتريتهوش وانتي اللي جبتيه لنفسك يا ابله ، واقفلنا فمكان اكل عيشنا وكمان مش معاكي خطيبك ولا جوزك لو كان معاكي راجل كان اعد ودفع ” ، لكم ان تتخيلوا انا طبعا عندت وقررت اني افضل واقفه النيل ده بتاع اي مصري ومش كفايه بئه مسخ بسبب الجهل لا والناس لسه مصره تخليه شيطان ، المفجأه التانيه بئه اللي عملهالي صاحبنا بتاع الكورنيش اني بصيت جنبي شوفت كراسي وهو اعد وبتاع حمص الشام وذبائن تانيين وانا في النص ، اعدت ازعق واتنطط شويه وانادي لظابط اللي كان اعد علي بعد 10 متر وشايف ، وفي الاخر مشيت وسيبتلهم النيل وريحته يمكن يكونوا هم اولي بيه مني ، ويمكن اكون انا السبب في جهلهم انا وكل الطبقه اللي مبتحاولش ترغمهم انهم يتعلموا وساكته علي استغلالهم وذلهم ، بس الاكيد ان النيل هو الاولي بيهم مشتكاش من عبثهم بيه وتخريبه لانهم لجأوا اليه عشان زي ما بيقول راجل الكورنيش ” اكل عيشهم ” .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.

The reCAPTCHA verification period has expired. Please reload the page.