web analytics
قصص

يومياتي مع حياتي (ليـلــو) 23

candels

لم تكن تلك الليلة كغيرها من الليالي..

نامت حبيبتي واتجهت بكل قوة كي أعد لهاني ما لذ وطاب..كم اشتقت له..اشتقت لكل تفاصيل حياتنا التي طالما راقت لنا ولم يفهمها أو يعيها غيرنا..

اشتقت لتلك الموسيقى الخاصة والتي لم أعتد سماعها سوى معه..وتلك الاضاءة الخافتة والشموع المعطرة التي تزين الأركان..

والهواء الممزوج بعطرين لا ثالث لهما..انه عطري وعطره فقط..

رائع..لقد انتهيت من الشق الأصعب..انجزت الطعام بأكمله..والآن يجب أن أرتدي شيئا لم يرني به حبيبي منذ فترة..

كنت قد استعدت وزني المثالي قبل الحمل وبدأت أشرع في ارتداء ما قد حرمت منه طوال حملي..

وأخيرا هالبس كعب عالي..وأخيرا هالبس بطلوني الجينز..وأخيرا بلوزاتي بقت مقاسي..يااااه..

وقفت لبرهة أنظر لملابس الحمل في دهشة وكأني مش أنا اللي كنت بالبسهم !!! معقوله أنا كنت بالبس تقريبا ضعف حجمي ؟!! يللا يللا مفيش وقت..

طبعا أنا كنت طاردة هاني لحد مااخلص..فاتصلت بيه واستنيته..الغريبة ان احساسي به كان زي احساسي وانا مستنياه يجي يتقدملي ويشوفني وانا لابسه حلو ومجهزه البيت عشان خاطره..استغربت جدا من مشاعري..يمكن لان مع وجود حبيبتي ليلو اتولدنا احنا كمان من جديد ؟ أكيد احنا بقينا اتنين تانيين..وحبنا خد شكل تاني أرقى وأعمق..

الله..ايه كل ده ؟

اتفضل يا فندم من هنا..الترابيزة محجوزة باسم أستاذ /هاني.. فردين مزبوط ؟

فهم هاني على طول ومثل معايا نفس الدور..

أيوة فردين..

وأول ماقعد قاللي: طيب ممكن منيو لو سمحتي

طبعا يافندم اتفضل..وطبعا هو ما كانش متخيل اني ههتم بالتفصيله دي..فكانت مفاجأه له

كنت مجهزه كل حاجه (هاند ميد) من كتابة المنيو اللي ماكانش فيه غير اللي أنا طابخاه طبعا..والاسعار المحطوطه والضريبة وطريقة العرض كمان

وجيت بعد كده قعدت معاه وكأني بمثل شخصيتين..شخصية الجرسونه وشخصية حبيبته

طبعا كان مش قادر يمسك نفسه من كتر الضحك..وكان يتخلل هذا الضحك اندهاش وتعجب وكلمات مدح لا تنتهي..وانا كمان قعدت أضحك بس المفاجأه ان من صوتنا العالي وضحكنا..

صحيت لـــيـــلــــــــــو ..

وجت قعدت معانا على السفرة وهي بتضحك بشكل خلانا نحس اننا مش لازم نتغاظ أوي يعني..ماهو أكيد هي مش قصدها تضايقنا..هي بس بتثبت وجودها..فضلنا نبص لبعض ونضحك بشكل خلاها هي كمان تضحك وتسقف..طبعا الاضاءة كانت خافته وده ضايقها..فاضطرينا نفتح النور ونطفي الشمع ..وطبعا بدأنا ناخد بالنا وبشده ان المواضيع مش سهله وعاوزة ترتيب أكتر بكتييييييير 🙂

 

Rasha Lotfy

طبيبة بشرية, دفعة ديسمبر 2006, تخصص أطفال..ولدت وتعلمت بالخارج وكنت من الذين لهم تاريخ دراسي مشهود..لي العديد من الهوايات..أحب الرسم, الزخرفة, كتابة الشعر والمقالات والكتابة بوجه عام, أعشق الموسيقى وأحب عزف البيانو والجيتار..أحب التمثيل وحصدت العديد من الجوائز في الجامعة بالفوز بالمركز الأول على مستوى الجمهورية عن التمثيل المسرحي لأعوام متتالية..أعشق مهنتي ولي فيها طموح يصل للا محدود..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.

The reCAPTCHA verification period has expired. Please reload the page.