web analytics
قصصكتابات شخصية

قلم سنه رفيع

images (1)

الحقيقه كان زمان عندي طقوس معينه عشان اتكرم واقبل ” قال ايه ؟” اروح المدرسه ، بعد الاجازه والفسح او مش شرط الفسح ، بعد ما الواحد كان بينام براحته ، فجأه يبئه مطالب يصحي السعه 6 الصبح !!!!!

كان من ضمن الطقوس دي ، طقوس تعقيديه ، قال يعني برده هطلبها ومش هيعرفوا يجيبوها فهعمل دور فيروز بتاع ” مش رايحه المدرسه ، حرمتوني من الحاجه اللي طلبتها اعمل ايه يا ربي ” ، لكن اللي يغيظ انها كانت بتيجي ، تخيلوا كانوا بيلاقوها ويجيبوهالي ،

كنت بعمل قائمة طلبات ،شبه اللي بنسمعها فالافلام لما واحده تكون رايحه لدجال ويقولها اشتري كذا وكذا ، لازم شنطه المدرسه تكون جديده وشيك جدا وملاقيش حد لابس زيها ويستحسن اني اختارها ، ومقلمه لازم تكون مليانه جيوب وعليها شخصيه كرتونيه مشهوره او اطلب لون معين من باب التعقيد ، الكشاكيل كلها تكون سطورها ملونه و غلاف الكشكول يكون شيك جدا وعليه ورد او دباديب ، اما المسطره لازم تكون احدث موديل مسطره فيها ماء سايل وسمك وحركات ،

والاقلام الجف ” لازم جدا جدا ومهم يكون سنها رفيع عشان خطها يبئه حلو واعرف اكتب فكشاكيلي الشيك جدا ، ومن باب التعقيد كنت بطلب الاقلام دي ” بريحه ” وتكون ريحة المانجو تحديدا ، والبرايه تكون علي شكل مختلف عن شكل البرايات العاديه ، والاستيكه تكون شبه الفواكه وغيره وغيره و ………..

ومع ذلك الحاجات دي اشترتها او لا ، فانا بغضب شويه واتحايلعلي ماما واقلها : ” ذهقتي مني يا ماما ، طب اعد معاكي واساعدك ” ،

كانت بتزعق وبتتعصب وفي أخر المطاف بروح المدرسه ، ويومين وبتعود وكل الحاجات اللي جبتها بتتكسر او تضيع او حالتها بتبئه كرب …. اه والله ، بس بكون دخلت في مود الدراسه وابدأ الكفاح لحد الاجازه ، مقدرش اقول غير كانت ايام جميله جدا جدا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.

The reCAPTCHA verification period has expired. Please reload the page.