web analytics
الطبخ

يا تكاتوا يا حركاتوا

السلام عليكم ورحمه الله وبركاته ………..

النهارده هنتكلم عن الحاجات البسيطه اللى ممكن ناس كتير مبتخدش بالها منها
هو ممكن الموضوع فى الاول يكون غريب لبعض الناس هحكيلكوا من الاول هههههههه معلشش بقي استحملوا

بما انى كنت جديده فى المطبخ يعنى بعمل بس حاجات بسيطه وكده لما اتجوزت ابتديت اقف مع قرايبي لما اكون معزومه او اصحابى لو عامله حاجه كويسه ابتديت متكسفش انى اتعلم من اى حد سواء كان كبير او صغير كل واحد بيكون ليه طريقه فى حاجه معينه او ممكن نقول كل واحد بيكون ليه تكه معينه هيا اللى بتخلى اكله ليها شكل معين …………..

مثلا ماما حبيبتى اكلها كله جنزبيل وزعتر وقرفه بهارات عربي فاكلها مميز وحماتى بتحط التوم فى اكتر الاكل فاكلها مميز يعنى مدرستين مختلفين تماما طبعا باخد طريقه دى فى حاجات وطريقه دى فى حاجات اصلهم ميجتمعوش بس التميز او التكه نفسها بتفرق ……..

حاجه تانيه بتخلينى احب اللى بيعلمنى انه يعمل حاجات جديده انا معرفهاش
مثلا …… تنظيف ازازه الصابون السايل بعد كل غسله مواعين مكنتش بتيجى على بالى شوفتها عند واحده قريبتى فضحكت وقولتلها ليه يعنى قالتلى لا مينفعش يكون حوضك نضيف والازازه مش نضيفه بقت عاده ومش وقت وفيه ناس كتيره مش بتهتم بيها . وكمان مفاتيح الكهربا مفيش ناس كتير بتنضفها الحاجات دى بتفرق اوى وبتخليكى مميزه عن غيرك بجد …………

الحلل الالمونيوم الغطا نحط عليه زيت قبل استعماله لانه بيعما عازل بين الغطا وبخار الميه اثناء الاستخدام فبيكون اسهل فى التنظيف ومبيبقعش الغطا ………

اللحمه والفراخ شوحيها الاول وحطى توم متشرح وبصل مقطع قبل ما تحوطى الميه ومتحطيش ملح من الاول هتلاقى طعمها مميز ………….

اللحمه المفرومه تتغسل كويس وتتصفى قبل الاستخدام ………..
الفراوله تتغسل كويس من الرمل ويترش عليها سكر وتتساب فى التلاجه يوم وبعد كده تحطيها فى اكياس وتفرزيها لما تطلعيها هتلاقيها حمرا ومش مغيره طعمها ……..

لما تطلعى حاجه من الفريزر مجمده حتى لو خضار اشطفيها بشويه مايه قبل الاستخدام علشان ريحه التلج …..

القلقاس ميتغسلش قبل التفريز بتمسحيه بس بقماشه قطن نضيفه وتفرزيه وقبل الاستخدام مباشره تغسليه ……

التوم ممكن تقشريه وتدقيه وتحوطى عليه ملح وفلفل وزيت وتحوطيه فى علب وعلى الفريزر وبكده يكون سهل الاستخدام فى اى وقت ………

يارب مكونش طولت عليكوا بس دى حاجات انا استفدت منها اوى وان شاء الله تكون جديده وتستفادوا منها ……………. مع السلامه

إغلاق