م
طبعا كل بنت بتحلم بيوم ما يتقدملها فارس الاحلام اللى بتحلم بيه واللى زى ما بيقولوا هيخطفها على حصان ابيض.
والحمد لله اهو جه اليوم اللى هبقه فيه عروسه اخيرا وطبعا الكل مش مصدق وطاير من الفرحه خلاص بقه اخيرا هتتخطبى وهنفرح بيكى ان شاء الله طبعا انا كنت بسمع الكلمه دى ايامها على طول والمعامله يا سلام اخر دلع .
المهم احكلكوا بقه اللى حصل .
* 11/11/2011 دا طبعا تاريخ مميز جدا وكان قبلها متقدملى خطيبى حاليا وصممت انه يكون اليوم ده يوم قرايت فتحتى والحمد لله تم بسلام والكل كان مبسوط وانا اولهم طبعا واتفقنا ان الخطوبه تكون فى شهر 3 علشان يكون الجو بدأ يبقى حلو ويكون الشتا فات.
* 2/3/2012 وده بقه يوم الخطوبه طبعا ايامها مكنتش فاضيه خالص من نزول علشان اشوف الفستان اللى هلبسه يوم خطوبتى للاكسسوارات والطرح وكل حاجه ايامها كان يا سلام الجو مفيش احسن من كده بجد كان جميل جدا جدا .
* لحد ليلة الخطوبه طبعا احنا شعب بيموت فى الهيصه والزمبليطه وكنت متفقه مع اصحابى انهم يجولى علشان نفرفش شويه وقاريبى واخواتى والجيران بقه ونعمل حفله تمام .
* المهم جه اليوم اللى قبل الخطوبه وسبحان مغير الاحوال اذا بالجو ينقلب 180 درجه والدنيا بعد ما كانت ربيع والجو بديع بقت الدنيا غمام والجو مش تمام خااااالص واستنى الناس تيجى علشان نهيص محدش يجى اتصل بواحده واقفل مع التانيه وكل واحده تقولى الجو وحش ادعى ربنا ان الجو يكون حلو بكره وانا اجيلك .
* وانا اللى مكنتش بسيب ولا واحده فيكوا اخص عليكوا وطبعا اليوم بعد ما كان هيبقه حلو اتقلب فوق دماغى ومحدش عبرنى للاسف .
*نيجى بقه ليوم الخطوبه صحيت من بدرى طبعا واول حاجه عملتها انى فتحت الشباك ابص ايه الاخبار الشمس موجوده ولا مش هتيجى وطبعا للاسف ملقتهاش بسبب الغيوم اللى كانت موجوده وياريتها جت على قد الغيوم دا كانت سيول فى اليوم ده عمرى ما هنساها طول حياتى من اول ما النهار طلع لحد ما روحت بتنا بعد الخطوبه وهى بتشتى .
*بس طبعا هعمل ايه مفيش تأجيل خلاص اخواتى يومها طبعا محدش عبرنى وقالولى هنروح على المسجد اللى كنت عملاها فيه بس الحمد لله قربتى اللى كانت هتعملى المكياج هى اللى عبرتنى وهى مجبره طبعا .
* انا بقه مش قادره اقولكوا الكلام اللى اخدته فى اليوم ده من كل اقاربى واصحابى من انك نحس او انك بخت قليل او او او وانتوا عارفين بقه الشعب المصرى مش بيعدى كبيره ولا صغيره .
* المفروض كان خطيبى هيجى ياخدنى قبل المغرب علشان نلحق المغرب فى المسجد المهم المغرب اذنت وهو لسه مجاش اتصلت بيه انتى فين ايه اخرك وبكل عصبيه لقيت اللى بيقولى العربيه غرزت فى حفره فى الشارع وبنحاول نطلعها؟؟طبعا انا سمعت كده وحصلى هسترية ضحك .
* وبعد معاناه الحمد لله وصلنا المسجد والعشا بتأذن ؟ وطلعنا وسمعنا الخطبه وبعدين لبست شبكتى اخيرا بقت كده بقة رسمى ونزلنا علشان نتصور وكل ده طبعا وانا و هوا بقينا ولا كأننا خارجين من تحت الدش بسبب المطر .
* روحنا الاستديو علشان نتصور والحمد لله اول ما قعدنا راح النور قاطع ؟؟ بس اهم حاجه فى اليوم ده ان كان كل موقف بيعدى بضحك الحمد لله .
* النور قطع فى الاستديو بس كان فى عرسان كتير غيرنا والله اعلم ده وش مين بقه ……
* الحمد لله اتصورنا وكنا طبعا متفقين قبل ما الجو الجميل ده يفاجئنا بالمفجأه الحلوه دى ان احنا هنروح نتعشى بره ونتمشى شويه اصلى هقلكوا احنا طبعا هنا فى دمياط عندنا مدينة رأس البر مفيش عريس وعروسه الا وبيروحوا يتمشوا على البحر شويه وطبعا انا كنت عايزه اعمل زيهم بس الحمد لله تتعوض بقه فى الفرح ان شاء الله ……
